بيانات من حروف خارجة عل السطر

البَيَانْ رَقَمْ واحَدْ : يوسَفْ الْمَغْرِبي … سَوْلُوا عَلْ لي شاطْ مَنّي فْ بيرْ إيَّامْكُمْ

سَوْلُوا السْما(ء) مَنْ لِي خَبّاتْ شَمْسها عْلينا بْ غْيُومْ وُ حَرّْشَتْ عْلينا شي نْجومْ ما تشُوفْنا غيرْ فْ ظْلامْ ڨلوبْنا ، وُ حَلْفَتْ عَلْ الما(ء) حَتّى يَشْرَبْنا مَنْ بيرْ إيّامْنا ،إِلَا وَكْحَتْ الَأرَضْ آشْ مَنْ فَرَضْ نْعَلْقُوا عْليهْ خَيْبَةْ الِأيَّامْ ؟ سَوْلُوا التْرابْ إِلَا جانا فْ الصّوابْ وُ حْلَفْ عَلْ الْمُوتْ حتى يبقى ديما مْعاها شْريكْ ،يْڨولْ لِهَا يَدّي فْ يَدّيكْ حَتّى نْخَلّيوْا اللّي ما شْرَى الْمُوتْ يَتْنَزَّهْ فيها ، اللّي ماتْ يَدْفَنّا مْعاهْ فْ روحُه ،وُ اللّي تْزادْ عَلْ الَبْلادْ تْخَلّيهْ غَ تيغْرادْ ،تْصَرْفُه صُورَة فْ عَيْنيها لُڨْمَة فْ يَدّيها إِلَا زَيَّدْها لْفُمُّه غيرْ جَرْحَة وُ تْزادَتْ عْلَى جْرُوحُه .   

مَلّي التْرابْ سْحا مَنْ الشْتَا(ء)

وُ لاحْ عْلَ ظْهَرْ الَحْجَرْ دُوخَةْ الصّباحْ

مَلّي الَبْحَرْ فَيْقُه صْداعْ الْموجْ

حَطْ رَجْليهْ بْزُوجْ خارَجْ الما(ء)

وُ سَدْ وَذْنيهْ بَ الرْمَلْ

مَلّي السْما(ء) قالَتْ : نْزيدْ نَعْلَا

وُ ما يَبْقَى يْشَدْني مْعَ الَارَضْ

غيرْ اللّي شاطْ مَنْ ضَوْ(ء) نَجْمَة مَنْ جْنابي طاحَتْ…

وُ طَيْحَتْ مْعاها خَلْوَةْ الظّلامْ

مَلّي الجْبَلْ دَلَّى الَحْبَلْ وُ عْطَى راسُه للَّوْطَى

قالْ : نْجَرَّبْ نْشُوفْني مَنْ الْتَحَتْ

إِلا تْواضَعَتْ مْعَ رَجْلي نَقْدَرْ نَطْلَعْ

يهَزّوني نَرْجَعْ ..نَحْسَبْ طُولي مَنْ الَوْطَى حَتّى لْراسي

مَلّي الْوادْ شْنَقْ عَلْ الما(ء)

حَتّى تْمَلْصَتْ وُ خَرْجَتْ عْيُونُه

لا ما(ء) بْقَى ما(ء)

حَتّى مَنْ جْراهْ بَدَّلْ لُونُه

مَلّي الصْباحْ شَعَّلْ فْتيلَةْ الشَّرْقَة وُ طاحْ فْ ظْلامْ الَقْلوبْ

هْنا زَيَّدْتْني نْشُوفْ … وُ شْحالْ مَنْ صْرُوفْ شَبْهاتْني

هْنَا تْعَكَّلْ الْقَلَبْ عْلَى عَتْبَةْ الَعْقَلْ

عْطيتْ راسي لَّلاحْلامْ مَبْلي بَ التَّفْقادْ

وُ حَتّى حَلْمَة ما تْبَرْعَت ْعْلِيَ وُ عْطاتْني

رْدَمَتْ الرّوحْ فْ اللّي بْقَى لِيَ مَنْ تْفَرْتيتْ الَعْظامْ

دْفَنَتْ اللّسانْ خارَجْ الَكْلامْ

وُ عَلَّمَتْ قْبَرْ كَتَبْتي بِهْ

وَ اِيّاهْ قالْ لِكْ : الغايَبْ… قْصيدْتُه مْعاهْ

وُ الحاضَرْ قْريبْ لَغْيابُه … حافَرْ قْبَرْ كَتَبْتُه حْداهْ

 

نْسَوَّلْني عَلْ اللّي شاطْ مَنّي

ياكْ غيرْ وْذينَة وْحيدَة … تَسْمَعْ الْحَسّ بْ لا ما تَفْرَزْ

تْجيبْ الَكْلامْ غيرْ عُرّامْ

تْلوحْ الصُّوتْ بْعيدْ مَنْ سَعَدْ الْغيبْ

وُ ياكْ غيرْ عَيَنْ فْريدَة … تَدْمَعْ بْ لا ما تَغْمَزْ

تْجيبْ الَاحْلامْ رْزامْ

تْلُوحْ الصُّورَة بْعيدْ مَنْ سَعَدْ الضّيمْ

ما هُوَ غيرْ الَعْقَلْ اللّي شادْ مْعَايَ حْبَلْ الصّبَرْ

يَفْتَلْني الْقَلَبْ وُ تَعْقُدْني الدَّنْيا مْعاهْ

نَعْصَرْ الشُّوفَة وُ نَطْحَنْ الصُّوتْ

نْشُوفْ حَتَّى نَعْيَا وُ نْقُول لَّلعْيَا(ء)

يغَرْبَلْ حْياتي لَسْويعاتْ كانْ الجَّهَدْ جَهْدي …

و ُكانَتْ الَحْياةْ قَدّي

يلاقيني مْعَ اللّي بْقَى فِيَّ مَنْ الذّاتْ

وُ لاّ اللّي بْقَى فِيَّ مَنْ الَحْياةْ

نْشُوفْني مَنْ بْعيدْ هّازْ الشّوفَة أحْلامْ

مْرَزَّمْ الصّوتْ كْلامْ

نْبَعَّدْ بْعيدْ عْلِيَّ … بْ لا شُوفَة بْ لا صُوتْ

يَمْكَنْ أحْسَنْ لِيَّ ما نْعيشْ مْعايَ حْياةْ الْمُوتْ

 

نْشُوفْ حَتّى نَعْيَا

وُ إِلا عْييتْ آشْ مَنْ شْفارْ يهَزْ عْيَا(ء) عَيْني

مْضَرَّكْ عَيْني مَنْ الْعَيَنْ

نَحْسَدْ الصُّوتْ الدّاوي فْ دْواخْلِي

شادْ عْيا(ء) عَقْلي بينْ يَدّي … لْجَامْ

يْسوقْني خارَجْ الَافْكارْ

الَخْوَى الخاوي يَعْمَرْ بْ مْدادْ مْخاوي الَبْياضْ

حَرَفْ، كَلْمَة، مَعْنَى ، قْصيدَة بْ سْطورْ

الْعامَرْ بْ الَافْكارْ الخاوْيَة

يجيبْني حَتّى لْحافَّةْ الدَّنْيا بْ تاريخْها …

اللّي بْ ذَلّ الَكْتُوبْ مَكْتوبْ

بْ وْسَخْها الحاجَبْ حَقّْ الصُّورَة

وُ صورَةْ الْحَقْ فْ حْسابْ الذَّنَبْ وُ الذْنوبْ

بْ مْسَخْها اللّي وَشْماتُه فْ لُغَة مَدْبوغَة

لا حَرَفْ يَحْشَمْ مَنْ حَرَفْ لا مَعْنَى يراعي مَلَحْ الَمْدادْ

 

 

 

نشَدْني مَنْ عْرَقْ إيّامي وُ نَدْفَعْني مَنْ الفوقْ

يَمْكَنْ نْطيحْ فْ يُومْ مَنْ غيرْ يُومي هَذَا ..

لا ساسَة يْبَدْلُوا الجلدْ بْ جَلَدْ مَسْلوخْ

لا فْقيهْ يَعْصَرْ مَنْ شوكْ هَمْنا خُطْبَة مَنْ وَرَدْ مَمْسوخْ

لا حاكَمْ يَطْحَنْ لْحَمْ لَمْغايْرَة فْ الرّحَى

لا شاعَرْ يعَرّي الْكَلْمَة مَنْ الْتَحَتْ

وُ قالْ حكا ساتَرْ عَوْرَةْ إيّامْنا بْ قْصيدَة مْحَجْبَة مَنْ الفوقْ

غيرْ سوقْ وُ بوقْ وُ البَرّاحْ بْ صوتْ مَشْنوقْ

وُ أنا وُ يّاكْ يا أنا

مزروعين ف تْرابْ الَبْلادْ غير سّبولَة بلا حبوب

نابْتينْ فْ غَفْلَة مَنْ الْحَرَثْ وُ السْقَا

هاكْ كُدْيَةْ الصْدَرْ فَدّانْ

نَزْرَعْني نَبْتَة خارَجْ الَمْحانْ

وُ هاكْ الَعْرَقْ مَطْمُورَة للَجْنانْ

نَسْقيني بَ اللّي شاطْ مَنْ حَلْمَة حاصْلَة فْ كَلْتَةْ إيّامي

وُ الدْمُوعْ دِيكِ الدّمُوعْ …

تَسْقي ضيمْ نَجَمْتي الْخَضْرا(ء) بْ الكُوتْ أَ كُوتْ

 

الَعْقَلْ نَقْدَرْ نْقُولْ كَ يْحَسّْ

حيثْ النّفَسْ ماشي مُولاتْ الدَّارْ وُ الَعْقَلْ غَ بَرّاني

وُ الْقَلَبْ حَتّى هُوَ غيرْ سالَتْ بينْ ضْلُوعْ الصّدَرْ

كَ يْفَكَّرْ وُ نَقْدَرْ نْقولْ  عاقَلْ وُ واعي

ياكْ النَّجْمَة الْخَضْرا(ء) رْسَمْناها بَ عْرَقْ الِايّامْ

وُ الَاحْمَرْ خْذَا شْوِيَّة مَنْ الجْمَرْ وُ شْوِيَّة مَنْ قَلَّةْ الَعْمَرْ

إِلَا تْحَطْ عَلْ الجَلَدْ نْحَسُّوا بِهْ وُ ما يْحَسْ بِنا

يَمْكَنْ حَطّابْ حْرَقْ الدَمّ حَتّى صارْ فاخَرْ قالْ : نَدْفاوْا بِهْ

يَمْكَنْ حْسابْ مَنْ طْلُوعْ الدَمّ حَتّى لَفْجَرْ الْهَمّْ

سَلْسُولْ جُوعْنا تَسْبيحْ فْ يَدْ الإقْطاعِي

سيحَةْ الْقَلَبْ وُ ما يْجيبْ مَنْ صْداعْ ..

نْسيتْ الَبْلادْ ڤلبْها هْشيشْ

وُ إلا ما خَفَتْ نَكْتَبْ  زارْعَة ڤلَبْ اصْطِناعي .

 

 

نَتْسَنّاني حَتّى يَتْقاضَى جَهْدي وُ نَعْطي الرّاسْ

نَعْطي الطّوعْ وُ نْبايَعْني فْ الخيبَة الَمْداوْمَة

نَتْسَنّاني حَتّى نَطْوالْ وُ نَعْجَبْني

نْمَدْ عَنْقي للَّكْلامْ الحافي يَتْمَضَّى عْليهْ

نْزَيَّدْ الظْهَرْ يَتْعَلَّمْ رْقادْ لَحْجَرْ

حَتّى إِلا سالاتْ كَذْبَةْ الَحْياةْ فْ بْلادي بْ قْبَرْ

نَلْقاني مْوَجَّدْني بْ شَلّة صْبَرْ

نَتْسَنّاكُمْ فْ كُدْيَةْ الَعْقَلْ …إِلا ثَمْرَتْ الَافْكارْ

وُ نْبَتْ الْمَعْقُولْ فْ صَحْرَا(ء) الَعْقولْ

نْشُوفْ حَتّى نَعْيَا …

وُ نْقُولْ عْييتْ مَنْ لَرْياحْ اللّي تْبَدَّلْ جِهَتْهَا فْ كُلْ ساعَة

عْييتْ مَنْ الرّْمادْ الَمْخَلَّطْ بْ تْرابْ الَبْلادْ

نْدَرْدَرُوهْ لِنا فْ الطْريقْ نْحَسْبُوا خْطاوينَا الْمَدْسوسَة بَ الشَكّْ

واشْ بْرَكْنا واقْفينْ عْلَ غَمّْ الْيومْ ؟

واشْ مْشينا بارْكينْ عْلَ هَمّْ البارَحْ ؟

واشْ تجْمَعْنا مْفَرْقينْ  عْلَ دَمّْ غْدَرْ إيّامَسْ ؟

واشْ جَعْنا شَبْعانينْ مَنْ قَلَّةْ الشّي ؟

واشْ شْبَعْنا فْ جوعْنا مَنْ كُلْ شي(ء) ؟

واشْ تْحَزَّمْنا حَتّى تَرْخَفْ لَحْزامْ بْ قَلَّةْ الجَّهَدْ ؟

واشْ عْيينا وُ صَرَّفْنا صْباعْ يَدّينا ..

فْ التْبَرْيَا وُ الدَقّانْ فْ بابْ داكْ الصْدَرْ الَعْظيمْ الرّاقَدْ ؟

 

عْييتْ مَنْ السّْحابْ ذاكْ الْكَذّابْ

تْقولْ ها هُوَ جايَبْ الما(ء)

وُ يَتْسِيَّفْ لْغَيْمَة غَ دايْزَة وُ مَحْسوبَة عَ الرّيقْ النّاشَفْ

عْييتْ حَتّى الَعْيا(ء) عَيّيتُه

ما بْقَى فْ الجَهَدْ حَطّيتُه وُ نْسيتُه

عَلَّقْتُه فْ صْدَرْ بْلادي  وُ ياكْ حْليبْها غيرْ غْيالْ

وُ ياكْ تْرابْها قيدْ وُ فْ رَجْلي ثْقالْ

وُ ياكْ هْواها شَحْطَة مَنْ رْياحْ الَهْبالْ

خوذيهْ يا الكارْحَة مَنّي وْسادَة مَنْ سَدْرَة

يَمْكَنْ شوكْها يْفَيْقَكْ مَنْ النّْعاسْ

خوذيهْ مَنّي يا جْنانْ الصّالْحَة مْدادْ كاسي

يكَتْبَكْ بْ قْلُمْ خْذَا شْوِيَة مَنْ ثَلَجْ دَمَّكْ البارَدْ

وُ شْوِيَة مَنْ كايْلَةْ فْيافيكْ الحامْيَة … يَمْكَنْ يجُرّوكْ للَّفْياقْ

خوذيهْ مَنّي يا الرّابْحَة مَنْ خُسْرانْها

وُ الخاسْرَة مَنْ تْقَرْقيبْ سْوارَتْ الرْباحْ

عْلينا وُ عْلَى صورَتْنا الهارْبَة بِنا فْ الكارَتْ البُّوسْطالْ

وَرْقَة زَرْقا(ء) حالْفَة حَتّى تكونْ بْياضْ فْ الظَّلْمَة

خُوذيني شَدّيني عَنْدَكْ

نراجَعْ كْتابي فْ ظْلامَكْ وُ نْرَدَّكْ وُ نْرُدْني للَطْريقْ .

 

 

البيان رقم جوج يوسَفْ الْمَغْرِبي : عيفَةْ الشّمُوسْ ..الَمْخَبْيَة شْعاها فْ جْيُوبْ شي جْنُوسْ

هِيَ قافْلَة وُ شَقّاتْ طْريقْها لْبيرْنا داكْ النّاشَفْ ،خْوَى بِها الدْلُو وُ الما(ء) الَحْلُو ،ما هَزَّاتْ غيرْ اللّي لْقاتْ ،كانْ بارَكْ وُ ما وَقْفاتُه غيرْ ديكْ الْحَلْماتْ عْلينا ،شي يْقُولْ لِهْ :” آشْ تْقُولْ فْ هَذِه ؟” وُ شِي يْقُولْ لِهْ : ” يَمْكَنْ تَفْسيرْ الْحَلْمَة  مْفَصْلَة عْلَى قَدْ بْلادي ؟ وُ أنا نْقولْ : الْبيرْ وُ الَخّوتْ … وُ الَبْلادْ دابّة فْ الَعْروقْ خْداتْ بَنَّةْ الْموتْ ،نْحُطْني مْعاكْ غيرْ حَلْمَة وُ شادَّة الصَفّْ ،نْهَزْني فْ رْحاكْ ،نَعْلا نَعْلا حَتّى نْبانْ لِيَ الْتَحَتْ …عْلاشْ ؟ والُو … راني غيرْ خايَفْ إِلَا هاذْ الْحَلْمَة تْجي قَدِّي فْ التْمَامْ ،وُ  نْزيدْ نَكْتَبْني ، حيثْ مَنْ اللّي كَ نَحْلَمْني كَ يوَلّي هَمّي  هُوَ كيفْ نْتَرْجَمْني للُّغَة وُ كْلامْ !

 

ياكْ هَرَّبْنا الشَّمَسْ فْ فانوسْ

حَطّينا شْعاها فْ جْيُوبْ شي جْنُوسْ

وُ سَبّيناها فْ الظْلامْ وُ قَلَّةْ الَاحْلامْ

وُ زَيَّدْنا بْ لا حَشْمَة بْ لا حْيا(ء) الَحْمامْ الطُّوبي

يْبَيَّضْ جِهَةْ الَفْجَرْ

وُ الرْتيلَة تَعْطي للَّشْعا بْ الظْهَرْ

حَتّى غابَتْ شَمَسْنا عْلَى غارْ حيرَةْ إيّامْنا

وُ هُكّاكْ وُ هَزّينا الَاقْلامْ سْيُوفْ

رَصّينا الصْفُوفْ مْسَلْحينْ بْ شِي حْرُوفْ

وُ فْ خُطْبَةْ عيدْ فْتُوحْ الشّمَسْ

قالْ لِنا إمامْنا :

” الله يَنْعَلْ اللّي ما يَحْسَمْ وُ يْقَرَّرْ

خْويوْا الشَّمَسْ مَنْ الضُّو(ء)

خَبّيوْا الشّْعَا للَوْضُو(ء)

وُ الشَّمَسْ اللّي شْعاها كانْ يْعَرّي ضُعُفْ إيّامْكُمْ

راني جْمَعَتْها بْ شَرْقَتْها وُ قايْلَتْها

خَبّيتْها لِكُمْ فْ تْرِيّاتْ شِي قْصُورْ

وُ يا مَكْواكُمْ فاضْحاها زْواقْها “.

 

 

 

ياكْ لَحْنا وَلَدْنا فْ الْبيرْ

وُ قَلْنا لِهْ : شوفْ كِ تْدّيرْ

حَتّى تْجيبْها حَلْمَة بينْ شَمَسْ وُ كَمْرَة وُ شي نْجُومْ ساجْدَة لِكْ

ياكْ الْبيرْ بيرْنا حَرَّشْ الْمَطْفِيَّة عَلْ الما(ء) وُ سَدّينا لِهْ فُمُّه

الدْلُو يا وَلَدْنا اللّي كانْ يقولْ سَعْداتْني بْ الما(ء) الَحْلُو

ياكْ حَنَّتْناهْ وُ زَيَّدْناهْ نَسْقيوْا بِهْ دْموعْنا وُ عْرَقْنا داكْ الْمالَحْ

وُ حْلَفْنا عَلْ الْجَرّارَة حَتّى تْسَلَّفْنا شْوِيَة مَنْ صْداعْها

يزَيَّتْ فّامْنا ، يحَرَّشْ كْلامْنا وُ نَلْقاوْا باشْ نَلْقاوْنا

وُ الَحْبَلْ اللّي شاطْ فْتَلْناهْ وُ عْقُدْناهْ كْبُلْ لَجْراحْنا

حَتّى إِلا سَرَّاحْ ديكْ وُ هاذْ الَجْراحْ  هَزْ غْطا(ء) بيرْنا وُ طَلّْ

ما يَلْقَى غيرَكْ يا وَلَدْنا ساجْدَة لِكْ الشَّمَسْ وُ الْكَمْرَة

وُ شي نْجومْ خارْجَة مَنْ فَلَكْ تَعْواكْ الذّيبْ

واشْ تْجيبْ يا الَغْريبْ

وُ الْحَقْ غَ شَرْقَة وُ مْعَكْلاها الَغْيُومْ ؟

حُطْ رْحاكْ عْلَ ظْهَرْ داكْ الزْهَرْ الرّاقَدْ شَلَّة سْنينْ عْجافْ

خَلّي الزّينْ يصُومْ …

وُ الموسْ يعُومْ فْ جْراحْ اللّيدْ اللّي قالَتْ : سيحَةْ التَفّاحْ

خَلّي الدَقّْ يَسْبَقْ الْحَقّْ

خَلّي جْوابَكْ غيرْ خَلْعَة وُ ماشي خْليعْ فْ خابْيَةْ جُوعْهُمْ

واشْ تْقُولْ يا وَلَدْنا فْ ديكْ الْبَقْرة الْحَمْرا(ء) الْحَلّابَة

السَّرْحَة مَنْ عَنَدْنا وُ الْعَلَفْ مَنْ جَلَدْنا

وُ حَتّى وْقيدْها أخْضَرْ وَ لاّ مْحَتْحَتْ سَفّيناهْ ؟

 

واشْ تْقولْ يا وَلَدْنا

فْ داكْ الطّيرْ الَمْفَدْفَدْ جْناحُه عْلَى خُبَزْ مْفَرْتَتْ فوقْ رْيوسْنا

إلا حْدَرْنا الرّاسْ يطيحْ مَنْ سَعَدْ النْمَلْ الَاحْمَرْ

وُ إلا خَلّيناهْ يسيحْ مْعَ دَمْ كَسْدَة

واكَلْ الطّيرْ مَنْ راسْها ؟

 

 

واشْ تْقُولْ يا وَلَدْنا

فْ ظْلامْ الْبيرْ الَمْخَبّي دَمْ مَغْدُورْ فْ توبْ إيّامْنا

الذّيبْ ذيبْنا وٌ احْنَ اللّي عَلَّمْناهْ يَلْبَسْ توبْ عْلَى قَدْ حْمُورِيَّةْ الْعينْ

فْسَخْ جَلْدُه وُ لْبَسْناهْ مْعَ هْرُوبْ الَبْحَرْ

حَتّى إلا دْفَعْ … وُ الما(ء) غَطّانا بْ أوْهامْنا وُ طْلَعْ

نْهَرْبُوا الْحَقْ فْ شْناقَرْ ديكْ وُ هاذْ الَحْجَرْ  .

 

 

 

 

 

 

شْهَدْ الشّاهَدْ مَنْ أهَلْ دارْنا

وُ نَقْلاتْ نْسانا اخْبارْنا

احْنَ اللّي تْبَعْنا بْلادْنا بْ الْعينْ الْحَمْرا(ء)

شي يقُولْ : ” تَمْراتْ وُ هَزّاتْ حَتّى تَقْلاتْ “

شي يقُولْ : ” تَقْلاّتْ مَنْ لِي هَزّاتْ وُ سَلّاتْ مَنْ مْرارْ جْراحْنا دُوكْ التَّمْراتْ “

وُ أنا نْقولْ لْذاكْ الشّاهَدْ :

إلا خْرَجْنا وُ خَرَّجْنا وَلَدْنا مَنْ ظْلامْ الْبيرْ سالْمينْ

وُ كْتابْ لِنا نْقَسْمُوا مْعاهْ ديكْ الْحَلْمَة الْبايْتَة …

اللّي ما طَلاّتْ عْلَى صْباحْ :

بْقَى شاهَدْ يا الشّاهَدْ …

عْلَى توبْ جْراحْنا فَزْراتُه ليدْ الِايَّامْ

يَمْكَنْ مَنْ الصّْدَرْ ، يَمْكَنْ مَنْ الظْهَرْ

هَزْنا يا وَلَدْنا حَلْمَة فْ ظْلامْ

وُ حُطْنا كَلْمَة بْعيدَة عْلَى زْحامْ الِايّامْ

مَنْ غُرُقْ الْبيرْ نَحْنيوْا ظْهَرْنا لِكْ يا وَلَدْنا

حُطْ رَجْليكْ وُ طْلَعْ

وَ اِيّاكْ و اِيّاكْ وَ اِيّاكْ يا يوسَفْ وَلَدْنا تْحَنْ لَظْلامْ بيرْنا وُ تَرْجَعْ

خَلّي الطّيرْ ياّكُلْ مَنْ رْيُوسْنا

خَلّي جوعْنا يراوَدْنا عْلَى نْفُوسْنا

خَلّي سْنينْ الَعْجافْ عُنْوانْ لَلْحابَسْ وُ الْمَحْبُوسْ فْ رْيُوسْنا

نْفَسْرُوا الْحَلْمَة بْ نْفوسْنا وُ نْكَتْبوها مَنْ جْديدْ

” يا بُويا يا بُويا … راني شَفَتْ فْ الَمْنامْ

الشَّمَسْ وُ الْكَمْرَة وُ شي نْجومْ ما نَقْدَرْ نْقُولْ لَمَّنْ ساجْدَة

وُ إلا كانَتْ هاذْ الْكَتْبَة قادَّة …

يَغْفَرْ لِها الله إلا قَلْبَتْ صورَةْ الْحَلْمَة بينْ ساجَدْ

يَمْكَنْ شَلَّة يَمْكَنْ غيرْ واحَدْ

وُ بينْ مَسْجودْ لِهْ

هُما شَلّة هُما جْراحْ الَمْحَلَّة

هُما احْنَ

وُ احْنَ فْ الْمَحْ-نَة شَلَّة وُ ماشِي غيرْ واحَدْ  “.