الرئيسية / الساخرة / تسريبات من قاموس بوكلاخ ….للمعلم هيوش بولفشوش : الدرس الأول

تسريبات من قاموس بوكلاخ ….للمعلم هيوش بولفشوش : الدرس الأول

مرحبا بيكم هذا السيمانة مع المعلم القراي هيوش بولفشوش لي غادي يشرح ليكم الاستعمالات الكثيرة ديال كلمة (برا)، ويتحدث لينا شوي على هضرة التلفون. كلمة (برا) ولي كتختلف المعنى ديالها ملي كتقرو ولا تغلظو ولا توركو على  شي حرفيات فيها. نقدرو في المثال نكولو ( هذاك الساط كان مريض و برا)، وكتعني بلي ولا صحيح فصيح ما بقات كتضرو حتى حاجة. ونقدرو نكولو (  الجيلالي ارسل لجمتو برا)، ولا نكولو ( طلق المرا ة  واعطيها براتها)، وكنعنيو بها  رسالة ولا وريقة ديال الطلاق، ونقدرو نصغروها وتولي (برية)، كيف كيكولو (سيفطت ليها برية باش تفكرني و تسول فية). ولو أن (تفكرني) حتى هي فيها وفيها… إلى فتحنا حرف التا وسكنا حرف الفا تولي معناها تقهرني وتعذبني وتسخسخني …جايا من الفكرة الله ينجينا وينجيكم منها. ولا شركتي (قطعتي) السروال ولا جلابية غادي يخص خيط و(برا). وهنا كتعني ذاك السفود الصغيور والرقيوق لي كتكون فيه تقبة في الراس وشوكة في الرجل. ولي كيسميو خوت سيبويه ب(الإبرة). وكاين لي كيدخل كلمة (برا) في معان أخرى، يقدر القائد والباشا تصدعو بالشكايات وينوض ليك ويكول (خرج علي برا)، وتقدر تتقلق ويبقى فيك الحال وتمشي لعند مول الشراب وتشري شي (برا) دوخ بها الراس وتنسى. وتقدر تخرج للزنقة وتلقى شي صاحبك وتبرد فيه غدايدك ويمشي لدار أباك يتبرا. المهم هذا الكلمة كتطلب منكم شطارة و حداقة كثيرة.

… وغاديين نختمو درسنا اليوم، بالهضرة ديال التلفون، وكفاش المغاربة ما يمكنش للمريكاني ترام باباه وقشاوشو يتصنتو علينا، حيث ما غاديين قشعوا حتى بصلة.  الدارجة كيف كان نكولوا حنا المغاربة عالاااااام. الدارجة ملقمة عندنا فيها كاع اللغات والستونات ها النكليزية ها الفرنساوية  وها السبليونية والعربية والشلحة و… عاد زيد ذاك شي كلام نوفو كيطيح على عربان كل تريكيل وتفلسيف… مريكان عياوا ما يتصنتوا لينا ما صوروا والوا  حيث ما فهموشاي هضرتنا… أش غادي يقشع شي مريكاني ولا روسي ولا حتى شي  عربي  من ستون هذا جوج ناس (ألو … وفين آالساط … عا في الدنيا… ودوز نشوفوك .. غير ندير وندوز … عنداك تنسى داكشي .. لا كون هاني راني دبرت عليه، واش داكشي نيت ولا شي تخرميزة، أخرى.. لا عشيري داكشي ستون واعر ، راني ضربت كعطة باش لقيتو… يحفظاك… ودبا اتلاح  راني سايق والجدارمية في الطريق… آش فهمتو …. )…

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: المحتوى محمي !!