بديل بريس جريدةرقمية إخبارية وثقافية
كلشي في بلادنا ساهل ماء … كلشي مباح… كلشي ممكن بنهار كهار وكثير في الظلمة
كلشي في بلادنا ساهل ماء… تعيش تبحث بالريق الناشف …على مسؤول يهتم زعما.. ولا منتخب في قلبو الرحمة
لا رقيب يداوم ويسرح شمس النهار… يبحث ويشوف آش كيتبطخ في البرما.
ولا حبيب يحضن لنفوس تحت الكمرة… وإلى غمات سما يلعب دور النجمة…
لا من يحمي العباد من ظلم الأشرار …ولا من الفساد للي غرسوه هنا و تما.
الحرام بالعرام جمعوه … شي خزنوه في مطامر… وشي طرقوه بالمسامر.. وشي كلاوه وتصابوا بالتخمة …
لا حبيب يسعف المرضى والأولاد … ويطفي نار العفن ويخوي الجفنة من الما
لامن يعاقب الأشرار ويمضي الأصفاد… ويحافظ على ما بقى للمغاربة من همة.
كلشي في بلادنا ساهل ماء … كلشي مباح… كلشي ممكن بنهار كهار وكثير في الظلمة
كلشي في بلادنا ساهل ماء… لا مسؤول يهتم ولا منتخب في قلبو الرحمة.
ملك البلاد هنا ولهيه رجليه في الغيس والما…
وشي ناس عايشين في خيرالبلاد … ولاو كيف ملوك زمان… دارو لنفوسهم الشان والهمة…
الملاوي والرشاوي والجيب يعمر واخا خاوي… ضاربين الدنيا بركلة …ودايرين المزلوط في الدمة
الزبل إلى كثر فين ما بغيناه يترمى …نبعد من داري وخلاص …نرتاح و نتهنى
المال إلى ساب كلشي ياكل و يجغم جغمة … وكيف ديما كلشي ينكر ويحتج ويحلف ما اخداش بالعما
لفلوس بالخناشي… يصرفوها شي ناس في العشوائي….في مشاريع فاسدة ووهمية الترما…
طرقان وقناطر تعمر بالتراب والردم … تنهار من أول قطرة ديال الماء
كلشي في بلادنا ساهل ماء … كلشي مباح… كلشي ممكن بنهار كهار وكثير في الظلمة
كلشي في بلادنا ساهل ماء… لا مسؤول يهتم ولا منتخب في قلبو الرحمة
مشاريع تبنى بالعما… إقامات تنبت بنهار كهار و كثيرها في الظلمة
لا تصاميم لا بني معقول … جدرانها تسيح بلول.. وناسها تغرق في الكريدي والأزمة
مخازن وضيعات تنبت في الضايات … تزاحم الفلاح وتزيدو في الأزمة…
إلى صبات الشتا الخير يفيض وما يفيض والصبا تخسر والترمى..
قطرات الماء خنقات قوادس وعفنات مدن وحولاتها لكرنة…
وإلى جفت الأرض الفلاح يموت بالجوع …ويتشهى قطرة الما
الكراب المسكين يتشهى الجفاف وشي عوينة باش يعمر الما… في السوق يولي بشانوا …مول الدوا والحكمة
كلشي في بلادنا ساهل ماء … كلشي مباح… كلشي ممكن بنهار كهار وكثير في الظلمة
كلشي في بلادنا ساهل ماء… ولا مسؤول يهتم ولا منتخب في قلبو الرحمة
آلاف الأسر في الخلاء تعاني … في الغيص الرجلين … والباقي مبلول في البرد تغطيه السما…
نساء تبكي وتزاوك وتحضن أطفالها وشيوخها…تسد فجوج البرد بذروعها وتحط اللحمة على اللحمة .
… لا بيوت لا متاع … لا صحة لا جاه …كلشي مع الواد مشى في زحمة… الجوع والبرد والعرى و المعنيين تصابو بالعما.
كلشي في بلادنا ساهل ماء… وملي تعطس السما ولا تبكي بدموع قطرات الما
تغرق مدن وقرى وتحل الصدمة… مغربنا يوقف يتشلل ويتصاب بالعما
ها العار إلى ما … حسب حساب الماء … في الشراب والغسيل وملي اتحمى… ولا تنسى تحميه وتخزنوا وتخليه كيف بغاه الله نعمة… وتخلي لعباد تطلب الغيث باش تعيش …ماشي باش تموت وترمى .
